Rüfət Səfərov: “Dəli utanmaz, yiyəsi utanar “

BUNA DA BAXIN

Zöhrabyan AŞPA-da Əliyevi tənqid etdi, Azərbaycanı təmsil edən millət vəkili səhvən dəstəklədi – Rüsvayçılıq

TALANÇI SABİQ MƏMURLARIN TƏHLÜKƏLİ SƏRVƏTİ…

Müəllif- Rüfət Səfərov

Hüququn üstünlüyünə, qanunun aliliyinə dayanan dövlət idarəçiliyində prokurorluq orqanlarının rolu və əhəmiyyəti yüksək tutulur: de-yure və de-fakto.

Bizdə də prokurorluğun konstitusion-hüquqi statusu qanunların icra və tətbiq olunmasına nəzarət edən, cinayət işləri başlayan, istintaq aparan, məhkəmədə dövlət ittihamını müdafiə edən, iddia qaldıran, qərarlardan protest verən kimi təsbit edilir.

Təsvir edin ki, Baş prokurorun rəsmi köməkçilərinin sayı Prezidentin rəsmi köməkçilərinin sayından çoxdur.

Fikrimin məhvəri budur ki, dövlət orqanı kimi Baş Prokurorluq, vəzifə kimi Baş prokuror hüquq siyasətinin müəyyən edilməsində başlaca rola malik olmalıdır.

Amma əvvəlki qeydlərimdə göstərdiyim kimi, mahiyyətcə, xaraktercə Sovet Azərbaycanının ilk Baş prokuroru olmuş Ə. Qarayev və S.Çivanovla qiyaslana bilinəcək üzQARAsı Zakir 20 il ərzində prokurorluq orqanlarının cəmiyyətdəki və dövlət idarəetməsindəki həddini, hadisə və proseslərə sirayətetmə baxımından nüfuzunu nəinki polis, eləcə də gömrük, vergi və ya fövqəladə hallar orqanlarının səviyyəsindən aşağı endirdi.

Burada üzQARAsının mayası tamahla yoğrulmuş kimliyinin, “nadzor”un hüquqi düşüncə tərzini andıran təfəkkürə sahiblik etməsinin, dağınıq şəxsiyyətinin, rəhbərin qarşısında “hüquqi hambal”lığının da rolu olub. Ki, nəticədə Ramil Usubovdan tutmuş Vilayət Eyvazovadək, Aydın Əliyevdən, Səfər Mehdiyevdən Kəmalləddin Heydərovadək, Eldar Mahmudovdan ta Mədəd Quliyevə, Ziya Məmmədovadək nazir və komitə sədrlərinin önündə farağat durub.

Ötən çıxışlarımda bir neçə dəfə qeyd etdiyim kimi, yeni Baş prokuror Kamran Əliyev savadlıdır, müasir biliklərə sahibdir, hüquq elmini dərindən mənimsəyib, istintaq işinin mahiranə bilicisidir ki, bu məziyyətlər də onu sələfindən fərqləndirir. Lakin K. Əliyevin üzQARAsı ilə oxşar cəhətləri də yox deyil: mənəvi üzüntü duymamaq, xəcalət çəkməmək və qeyri-utanclıq.

Bəli, həmin keyfiyyətlərə əvvəlki və indiki baş prokurorlar ortaqlıq edirlər.

Necə?

Bax beləcə:

Milli Şura Koordinasiya Mərkəzinin üzvü Gültəkin Hacıbəylinin keçmiş həyat yoldaşı Mahmud Mehdiyev üzQARAsının 18 iyun 2010-cu il tarixli əmri əsasında prokurorluğun müstəntiqi ilə bir araya sığmayan fəaliyyətlə məşğul olduğuna, hərəkətə yol verdiyinə görə qovulur.

Mövcud üsul-idarəyə qarşı prinsipial və ardıcıl surətdə mübarizə aparan Gültəkin xanımı heç bir vəchlə susdura bilməyən hökumət “teatr səhnəsi”nə M. Mehdiyevi, anasını, bacısını çıxarır.

O, 17 may 2013-cü ildə Gültəkin Hacıbəyliyə qarşı mətbuat konfransı keçirib təhqir edir, korrupsiyada, rüşvətxorluqda və s. cinayətlərdə ittiham edir və görün nə deyir:

“…Lakin bu gün bir vicdanlı azərbaycanlı, dövlət maraqlarını şəxsi maraqların fövqündən daha uca hesab edən insan kimi Gültəkin Hacıbəylinin öz dövlətinə qarşı iftira dolu hərəkətlərinə susa bilməzdim. Mətbuat konfransı keçirməkdə məqsədim son vaxtlar Gültəkin Hacıbəylinin dövlətə qarşı, ölkə prezidenti İlham Əliyevin Azərbaycan xalqının rifahına xidmət edən siyasətinə qarşı bəzi mətbuat orqanlarında etdiyi qərəzli çıxışlarıdır”.

Övladının anasının əleyhinə olmazın iftiralar səsləndirən, ailəsinə dəyər verməyib, “vicdanın, dövlətin qayğısına qalan”, prokurorluq orqanlarına bərpa olunmaqçün ən müqəddəs dəyərləri tapdalamaqdan çəkinməyən bir karyerist davam edir:

Nəsimi Rayon Məhkəməsində iddia qaldırır, 9 ildə bir dəfə maraqlanmadığı və bir manat aliment ödəmədiyi halda uşağın Gültəkin Hacıbəylidən alınıb ona verilməsini tələb edir. Uşaq atasını tanımasa da Prezident Administrasiyasının məlum şöbəsinin kobud davamı olan məhkəmə iddianı təmin edir.

Mahmud Mehdiyevin bacısı Aynur Mehdiyeva 10.06.2013-cü il tarixdə Daxili İşlər Nazirliyi İnsan Alverinə qarşı Mübarizə İdarəsinin keçirdiyi əməliyyat tədbiri nəticəsində saxlanılır. Elə həmin gün- 10.06.2013- cü il tarixdə anaları Nəhayət Məmmədova Nəsimi Rayon Məhkəməsinə iddia ərizəsi verir və Gültəkin Hacıbəylidən 50 min dollar pul tələb edir.

İddiaçı Gültəkin xanıma 10 il əvvəl borc pul verdiyini iddia etsə də heç bir sübut, müqavilə, notarial qaydada təsdiq olunmuş sənəd təqdim etmir, eyni zamanda niyə 10 il əvvəl verdiyi borcu indi istədiyini də əsaslandıra bilmir, “kefim belə istəyir” deyir…

Guya təqaüddə olan evdar qadın Nəhayət Məmmədova Mahmud Mehdiyevin korrupsiya və rüşvətxorluqda ittiham etdiyi keçmiş millət vəkili Gültəkin Hacıbəylinin maddi imkanı çox pis olduğu üçün ona 2013-cü ildə 50 min dollar borc pul verir… Halbuki Gültəkin xanım o zaman iddiaçının oğlu ilə evli idi və maddi imkanı pis olan oğluna yardım etmək, ona mənzil almaq əvəzinə niyə gəlininə külli miqdarda borc verməsinin səbəbi aydın olmur.

2013-cü ilin sentyabrında Aynur Mehdiyeva və Mahmud Mehdiyev Gültəkin Hacıbəyliyə qarşı Yasamal Rayon Məhkəməsində xüsusi ittiham qaydasında cinayət təqibinə başlayırlar. İki il davam edən proses boyu Aynur Mehdiyeva iddia edir ki, Gültəkin Hacıbəyli onu insan alveri cinayətinə görə saxlanıldığını bildirməklə böhtan atıb. Ciddi beynəlxalq təzyiqdən sonra Bakı Ağır Cinayətlər Məhkəməsinin 19 may 2013-cü il tarixli hökmü ilə Aynur Mehdiyeva Cinayət Məcəlləsinin 144-1.2.8-ci (insan alveri) və 144-2.1-ci (məcburi əmək) maddələri üzrə təqsirli bilinir, 8 il 6 ay müddətinə azadlıqdan məhrum edilir. Lakin “yüngülləşdirən hallar”, yəni özünün və ailəsinin Gültəkin xanıma qarşı “böyük xidmətləri” nəzərə alınır, Cinayət Məcəlləsinin 70-ci maddəsi işə salınır. 8 il 6 ay azadlıqdan məhrum etmə cəzası şərti olaraq tətbiq edilir, cəmi 1 il sınaq müddəti müəyyən olunur.

Həmin cinayət işinin materiallarında qeyd edilir ki, Aynur Mehdiyevanın insan alveri və əməyin istismarı cinayətlərini törətməsini ailə üzvləri bilib, görüb, lakin yaxın qohum olduqları üçün məsuliyyətə cəlb olunmayıblar.

Dostlar, diqqət edin:

Nə vaxtilə üzQARAsının əmri ilə prokurorluqdan qovulması, nə bacısının insan alverinə görə məhkum olunması Mahmud Mehdiyevin 2014-cü ildə Xətai Rayon Prokurorluğunun müstəntiqi vəzifəsinə təyin edilməsini əngəlləmir.

Bəli, ÜzQARAsının sahibləri direktiv verir, o da müticəsinə əvvəlki əmri cırıb atır zibil qutusuna, yeni bərpa əmrini qaralayır.

“Şanlı prokurorluq orqanı əməkdaşı”, bacısının insan alveri cinayətini görüb seyr edən, hətta mətbuatın yazdığına görə zamanında hərbi xidmətdən yayınan Mahmud Mehdiyev hazırkı karyerasına görə nəinki Gültəkin Hacıbəyliyə, hətta öz doğma övladına etdiyi pisliklərə borcludur. Məhz onun vasitəsilə hökumət 16 yaşlı məktəblinin xaricə çıxışını və təhsil hüququnu bu gün də əngəlləyir.

Mahmud Mehdiyev 24.10.2014-cü il tarixdə Nəsimi Rayon İcra və Probasiya şöbəsinə məktub yazaraq vaxtı olmadığı üçün uşaqla görüşdən rəsmən imtina edir.

Buna baxmayaraq, məhkəmələr 16 ildə oğlu ilə bir dəfə görüşməyən və görüşdən rəsmi qaydada imtina edən “ata”nın hüquqlarını əsas götürərək Gültəkin Hacıbəylini yeganə övladının keyfiyyətli təhsil haqqını əlindən almaqla cəzalandırırlar.

Dostlar, bir qədər əvvəlsə məlumat aldım ki, bu Mahmudu Kamran Əliyev daha da irəli çəkib- Baş Prokurorluğun Xüsusi müsadirə məsələlərinin əlaqələndirilməsi idarəsinin prokuroru vəzifəsinə təyin edib.

Belə çıxır ki, prokurorluq orqanlarında irəli çəkilmək üçün “gözü ilə görən”, övladından imtina edib, keçmiş həyat yoldaşına böhtan atmalısan, şər yaxmalısan, ərənliklə əsla bir araya sığmayan tərzlərə üstünlük verməlisən, cənab Baş prokuror Kamran Əliyev?!

Belə kişilikmi olar?

Azərbaycan xanımına qarşı bunca iyrənc əməllərə imza atmağın adı bilirsinizmi nədir?

Nakişilik!

Xanımlar və cənablar, Siz deyin, yuxarıda qeyd etdiyim kimi, mənəvi üzüntü duymaq, xəcalət və utanmaq hissi Kamran Əliyevə və onunkimilərə xasdır, yoxsa yad?

Axı atalar demiş ki, dəli utanmaz, yiyəsi utanar…

Hefteaz.tv