Hüquq müdafiəçisi odlu silahla hədələnmə ilə bağlı dövlət orqanlarına müraciət edib“Demokratiyanın Müdafiəsinə Kömək” İctimai Birliyinin sədri, hüquq müdafiəçisi Vidadi İsgəndərli Vergilər Nazirliyindən məktub alıb.
V.İsgəndərli “Yeni Müsavat”a açıqlamasında deyib ki, vergilər nazirinin müşaviri İlqar Əhmədovun imzaladığı məktubda onun bir müddət öncə nazirliyə yazdığı müraciətinə cavab verilib: “Mən ”Modern servis” MMC və “Ruslan tikinti demontaj” MMC-də baş verənlərin yoxlanması üçün bir çox dövlət qurumlarına, Vergilər Nazirliyinə müraciət etmişəm. Çingiz Səlimovun MMC-lərində rüşvət və korrupsiya, vergidən yayınma hallarının olduğunu vurğulamışam.
Müraciətlərimə cavablar almışam. Vergilər Nazirliyindən aldığım cavabda qeyd edilir ki, Çingiz Səlimovun MMC-lərində vergidən yayınma halları ilə bağlı səyyar vergi yoxlaması keçiriləcək. Nəticəsi haqda məlumat verəcəklərini də qeyd ediblər”.
V.İsgəndərli Ç.Səlimovun əmlak məsələləri üzrə dövlət komitəsinin rəhbəri Kərəm Həsənova və onun deputat qardaşı Malik Həsənova güvənərək qanunsuzluqlara yol verdiyini söyləyib. Qeyd edib ki, Potu kənd sakini Ağalar Səlimovun müraciətindən sonra bu məsələnin araşdırılmasına başlayıb: “Çingiz Səlimov öz yaxını olan iş adamı Ağalar Səlimova qarşı dələduzluq edib. Bu adamlar centelmen razılaşması əsasında Göyçay rayonunda ”Göy Göl” istirahət mərkəzi tikiblər.
İstirahət mərkəzinin tikintisinə Ağalar Səlimova da məxsus vəsaitlər sərf edilib. İndi Ağalar Səlimov həmin vəsaiti geri istəsə də, Çingiz Səlimov vermir. Ağalar Səlimov deyir ki, Çingiz Səlimov istirahət mərkəzinin tikintisinə dövlətdən taladığı pulları da sərf edib. Qoy dövlət orqanları məsələni araşdırsınlar. Söhbət böyük-böyük zavodların, binaların sökülməsindən, avadanlıqların mənimsənilməsindən gedir. Dövlətin pulunu yeyiblərsə, dövlət bu məsələni araşdırmalı, hüquqi qiymət verilməsinə nail olmalıdır. Mən məsələ ilə bağlı Göyçay Rayon Prokurorluğuna müraciət etmişəm. Təəssüf ki, prokurorluq məsələni səthi araşdırıb və işə xitam verib. Üstəlik Ağalar Səlimovu da həbslə hədələyiblər. Mən Göyçay rayon prokuroru Muxtar Eminova bildirdim ki, “Modern servis” firmasının fəaliyyətində külli miqdarda dövlət vəsaitinin mənimsənilməsinə dair faktlar var. Korrupsiya və rüşvət faktlarının araşdırılması isə Korrupsiyaya Qarşı Mübarizə İdarəsinin səlahiyyətinə daxildir. Bu barədə Baş Prokurorluğa və Korrupsiyaya Qarşı Mübarizə Idarəsinə də müraciət etmişəm. Lakin faktlar araşdırılmadan işə xitam verilib”.
Hüquq müdafiəçisi deyib ki, prokuror ona hədə-qorxu gəlib: “Dedi ki, faktları sizin əleyhinizə çevirərəm. Işə xitam verildikdən sonra Çingiz Səlimov digər qardaşı Əbülfəz Səlimovla birgə mənimlə görüşdü. Onlar dedilər ki, bu işə qarışmayım. Həmçinin bildirdilər ki, bu işi ört-basdır etmək üçün əllərindən gələni edəcəklər. Hətta məni ölümlə hədələdilər. Açığı, mən bu hədə-qorxuya əhəmiyyət vermədim. Amma sonradan mənə bəlli oldu ki, bu şəxsdə avtomat silah var. Həmçinin aydın oldu ki, bu şəxs ”Göy Göl” İstirahət Mərkəzinin icarədarları Ehtiram Novruzəliyevin və Novruz Babayevin üstünə silah çəkib. Məsələ ilə bağlı prezident İlham Əliyevə, milli təhlükəsizlik naziri Eldar Mahmudova, baş prokuror Zakir Qaralova dəfələrlə müraciət etmişəm”.
