“HAKİMİYYƏT DƏYİŞİKLİYİ PLANI RUSİYADA HAZIRLANIR”

Ərəstun Oruclu: “Moskva hakimiyyətin içindən özü üçün daha əlverişli fiquru iqtidara gətirməyi hədəfləyib…”

Son dövrlərdə Rusiya mediası və ekspertləri Azərbaycanda və ümumiyyətlə, postsovet respublikalarında hakimiyyət dəyişikliyi ilə bağlı tez-tez yazmağa başlayıb. Xüsusən də Ukraynada inqilabdan sonra Rusiya mənbələri daha çox bu xətti irəli sürür ki, Qərb postsovet ölkələrində hakimiyyət dəyişikliyi vasitəsilə özünə yaxın qüvvələri iqtidara gətirməklə bağlı planlar hazırlayır.
Bir qədər əvvəl Qərb Rusiyanı daha da zəiflətmək üçün ona qonşu ölkələrdə dövlət çevrilişləri seriyası hazırlaması və o sırada Azərbaycanın olması ilə bağlı daha bir təhlil dövriyyəyə buraxılıb. Virtualaz.org saytı xəbər verir ki, bu sensasion fikirlərlə rusiyalı ekspertlər “Svobodnaya pressa”da çıxış ediblər. Sözügedən materialda bildirilir ki, ABŞ Ukraynada 2014-cü ildə həyata keçirilmiş çevrilişlərlə kifayətlənmək niyyətində deyil və Rusiyaya qonşu digər ölkələrdə də siyasi rejimləri dəyişdirməyə çalışacaq.
“2015-ci ildə yeni ”narıncı” inqilablar gözləmək olar. Prinsipcə, yeni heç nə yoxdur, dövlət çevrilişlərinin bütün texnologiyası köhnədir, təkcə ayrı-ayrı metodikalar modernləşdirilir”, – deyə “Geopolitika” jurnalının baş redaktoru Leonid Savin bildirib. Onun fikrincə, 2015-ci ildə Qərb çox güman ki, Ermənistandakı vəziyyəti qarışdıracaq. Vəziyyətin qarışa biləcəyi ölkələr sırasına Azərbaycanı da daxil etmək olar, çünki L.Savinin qənaətincə, Bakının Vaşinqtonla və Qərbi Avropa ilə münasibətləri pisləşir.
Yeri gəlmişkən, analoji məlumatlar Azərbaycanda tirajlanır. Özü də rəsmi qurumların əli ilə. Məsələn, ötən il həbs olunan QHT fəalları və fəaliyyətinə son qoyulan təşkilatlara qarşı əsas ittihamlardan biri də bu qurumların məhz Qərbin dəstəyi ilə Azərbaycanda hakimiyyət dəyişikliyi hazırlaması ilə bağlı idi. Belə iddialar nə qədər realdır? Ümumiyyətlə, indiki zamanda Azərbaycanda hakimiyyət dəyişikliyi mümkündürmü? Nəzərə alsaq ki, Azərbaycanda ənənəvi siyasi müxalifət təşkilatları xeyli dərəcədə zəiflədilib, xalqla əlaqələri məhdudlaşdırılıb, baş verə biləcək hakimiyyət dəyişikliyi zamanı iqtidara hansı qüvvələr gələ bilər?


Mövzu ilə bağlı söhbət etdiyimiz politoloq Ərəstun Oruclu deyir ki, bu iddiaların məhz rusiyalı ekspertlər tərəfindən ortaya atılması Rusiyanın Azərbaycanla bağlı planlarının bir hissəsidir: “Rusiya mediasının və ekspertlərinin Qərbin Azərbaycanda hakimiyyət dəyişikliyi həyata keçirəcəyi ilə bağlı proqnozları təsadüfi deyil. Nəzərə almaq lazımdır ki, rəsmi Bakının Qərblə münasibətlərinin pozulmasının ssenarisi Rusiyada hazırlanıb. Bu ssenarinin növbəti bəndi də ondan ibarətdir ki, Rusiya Azərbaycanda hakimiyyəti dəyişəcək və özü üçün daha əlverişli fiquru hakimiyyətə gətirəcək. Bunu da bəri başdan özünü sığortalamaq üçün Qərbin ayağına yazırlar”.

Politoloqun fikrincə, Rusiya Azərbaycandakı adamlarını hərəkətə gətirmək, hakimiyyət dəyişikliyi həyata keçirmək istəyir. Bunun üçünsə əsas qüvvə olaraq hakimiyyət içərisindəki Rusiyaya yaxın oliqarxlar olacaq. Ekspertə görə, son dövrdə aparılan kampaniya məhz bu planı reallaşdırmağa xidmət edir: “Birinci buna aydınlıq gətirmək lazımdır. Mən əminəm ki, Azərbaycanın Amerika və Avropadan təcrid olunmasının arxasında məhz ölkədə hakimiyyət dəyişikliyi planı dayanır. Məhz Rusiyanın planını reallaşdırmaq üçün Rusiyanın ssenarisinə uyğun olaraq Azərbaycanda bütün vətəndaş cəmiyyəti institutları, media sıradan çıxarılır. Rusiya bunun üçün hakimiyyətin içindəki bir sıra oliqarx nazirlərdən istifadə edəcək. Onlardan daha güvənlisi hakimiyyətə gətiriləcək. İstisna etmirəm ki, bu prosesdə Türkiyə də iştirak edəcək. Bu ssenari yalnız bir halda baş tutacaq ki, həqiqətən də Qərbin bunun qarşısını almağa gücü çatmasın. İstənilən halda hakimiyyətin alternativi elə hakimiyyətin öz içindən, hakim elitanın daxilindən olacaq. Əks təqdirdə, hakim elitaya daxil olan bir sıra rəsmilər, nazirlər, yüksək rütbəli məmurlar kapitalı, mülkiyyəti, hətta övladları Qərb ölkələrində ola-ola belə canfəşanlıqla Qərblə münasibətləri korlamazdılar. Əgər korlayırlarsa, deməli, daha böyük uduş əldə etməyə hazırlaşırlar”. (musavat.com)