Bir neçə gün əvvəl ölkə mətbuatında yayımlanın xəbərə görə, Laçın rayon icra hakimiyyətinin səlahiyyətli nümayəndəsi sayt rəhbərlərindən birini şəxsi telefonundan arayaraq onu öldürməklə ittiham edib. Bu ərəfədə Fransada terrorçular tərəfindən 12 jurnalistin qətl edilməsinin dünya ictimaiyyətinin diqqətində olduğunu nəzərə alsaq, məsələnin ciddiliyinin fərqinə varmış olaraq. Çünki ittiham edilən tərəf – yəni jurnalisti ölümlə hədələyənlər, həm də reputasiyalarında “erməni qohumluğu” kimi ciddi ittihamı gəzdirən şəxslər idi. Bu barədə bir qədər sonra…
Hələliksə, jurnalisti ölümlə təhdid edən kəslərin əslində kimlər olduğuna qısa nəzər salaq.
Akif Səlimov 2013-cü ilin Mart ayında Laçın Rayonuna icra başçısı təyin olunduqdan qısa müddət sonra ölkə mətbuatında artıq milli ayrıseçkilk salan “rəhbər” kimi ittihamlarla üzləşdi. Rayon sakinlərinin ittiham hədəfində olan Səlimov bu ittihamlara cavab vermək əvəzinə şikayətçiləri hədə-qorxu yolu ilə susdurmağa çalışaraq yenidən mətbuatın anti-qəhrəmanına çevrildi.
Ölkə mətbuatında yayımlanan məlumatlara görə də A.Səlimov Laçın RİH-nin yeni başçısı təyin olunduqdan dərhal sonra bu qurumun strukturunda əksər məsul postları tutan şəxsləri, o cümlədən hümanitar məsələlər üzrə müavin Bəsti Nəcəflini, aqrar məsələlər üzrə müavin S.Məmiyevi, ümumi şöbənin müdirü N.Nəcəfovu, RİH-nin komendantı Şakir İbrahimovu, Mədəniyyət və Turizm şöbəsinin müdiri İ.İlyasovu öz vəzifələrindən azad etmişdir. Məlumatlarda bildirilir ki, həmin vəzifələrə Akif Səlimova yaxınlığı ilə seçilən kadrlar təyinat almışlar.
Yerli mənbələr tərəfindən təqdim olunan məlumatlarda Akif Səlimovun yeni komanda yaratmaq üçün kadr seçimini məhz etnik mənsubiyyət kriteriyaları əsasında həyata keçirdiyi iddia olunur. Məlum olduğu kimi Azərbaycanda etnik mənsubiyyət zəminində vətəndaşlar arasında ayrı-seçkiliyə yol verilməsi olkə qanunları ilə qadağan olunub. Digər tərəfdən isə yüksək vəzifəli məmur tərəfindən nümayiş etdirilən belə mövqe kütlə daxilində dərhal öz ardıcıllarını taparaq daha böyük və təhlükəli fəsadlara yol aça bilər.
Məhz bu səbəbdən hər hansı RİH başçısının dövlət və ümumxalq mənafeylərinə zidd milli-etnik “siyasəti” yolverilməzdir və bu kimi halların qarşısı dərhal və qətiyyətlə alınmalıdır.
Bu olaylarda təəccüb doğuran bir cəhət də məhz elə bundan ibarətdir ki, uzun illər polis orqanlarında işlədiyi bildirilən Akif Səlimov özü də bu sadə həqiqətləri yaxşı bilməlidir. Bununla belə, onun dövlət orqanına işə qəbul zamanı etnik mənsubiyyət əsasında seçim həyata keçirmək ideyası, dolayısı ilə əhali arasında milli-etnik zəmində ədavətin qızışdırılması cəhdləri kimi qiymətləndirilməyə bilməz.
Yerli mənbələrdən daxil olan başqa bir məlumatda isə Akif Səlimovun həm də vəzifə səlahiyyətlərindən sui-istifadə edərək, vətəndaşların hüquqlarının pozulması ilə müşayiət olunan qisasçılıq və əvəz çıxma kimi qeyri-etik davranış formalarına yol verdiyi bildirilir.
Məsələn, qeyd olunur ki, 121 saylı Laçın Dairə Seçki Komissiyasının sədri Ş.Paşayevin bu vəzifədən kənarlaşdırılmasını yerli sakinlər artıq üç il davam edən ədavətin məntiqi nəticəsi kimi qiymətləndirirlər. Məlumatlara görə, 2010-cu ildə Akif Səlimov 121 saylı Seçki Dairəsindən Milli Məclisə deputat kimi öz namizədliyini irəli sürmüşdü. Bildirilir ki, həmin vaxt kifayət qədər səs toplaya bilməyən A.Səlimov buna görə məhz Laçın RİH-nin keçmiş icra başçısının və Dairə Seçki Komissiyasının sədrinin məsuliyyət daşımalı olduqlarına özünü inandırıb. İndi isə əlinə düşən imkandan istifadə edən başçı qısa müddətdə komissiya sədrinin dəyişdirilməsinə nail ola bilib.
Bütün bunlardan əlavə, Akif Səlimov barədə daha bir şok yaradacaq olay isə onun ermənilərlə qohum olması ilə bağlıdır. Hefteaz.Tv-ni məlumatlandıran mənbə iddia edir ki, A.Səlimovun bacanağı Laçın Rayonun işğalına rəhbərlik etmiş, Ermənistanın Milli Qəhrəmanı Muşeq Xoyluntsdur. Bu adı çəkilən zat bir zamanlar Gorus rayon Milis İdarəsinin rəisi vəzifəsində çalışıb. Əldə etdiyimiz məlumata görə, bu qohumluğun təməli Akif Səlimovun 1972-1974-cü illərdə SSRİ Silahlı Qüvvələrində həqiqi hərbi xidmətdə olduğu zaman qoyulub. Mənbənin Hefteaz.TV-yə verdiyi bilgiyə görə, Ukraynada hərbi xidmətdə olan Akif Səlimovun elə oradaca aşiq olaraq daha sonra evləndiyi həyat yoldaşının digər bacısını da Muşeq Xoylunts özünə arvad edib. Nə qədər qəribə olsa da, Akif Səlimov Laçın rayonu milis şöbəsinin rəisi işlədiyi ərəfədə Laçını işğal etmək üçün bu şəhərə üz tutan Gorus rayon milis idarəsinin başında onun bacanağı dayanırdı. Maraqlıdır, görəsən Laçının müəmmalı işğalında bu qohumluğun hansısa rolu varmı?
Mövzunu davam etdirəcəyik…
Hefteaz.TV
