Daşınmaz əmlak biznesi ilə məşğul olan britaniyalı biznesmen, yəhudi əsilli rusiyalı milyarder Boris Berezovskinin yaxın dostu olan Skot Yanq müəmmalı şəkildə ölüb.
Virtualaz.org saytı xəbər verir ki, bu hadisə Britaniya mediasının əsas mövzusudur.
Xəbərdə bildirilir ki, Skot Yanq bu həftənin əvvəllərində özünü Londonun dəbdəbəli Merilebon kvartalında, beşmərtəbəli binanın beşinci mərtəbəsində yerləşən mənzilindən aşağı atıb. Ən azı polisin versiyası belədir.
Biznesmen mənzilindən çıxıb və özünü aşağı ataraq metal hasara dəyərək ölüb. Polis hadisənin intihar olduğunu ehtimal edir.
Lakin Britaniya mediası yazır ki, Skot Yanq rus və türk mafiyasına milyonlarla funt borclu idi. “The Business İnsider” biznesmenin mafiya tərəfindən təqib olunduğunu, iki il əvvəl qanqsterlərin onu qorxutmaq və xəbərdarlıq etmək üçün Dorçesterdəki otelin pəncərəsindən asmışdılar.
Həmçinin cəmi bir neçə həftə əvvəl Yanqın keçmiş arvadı Mişel özəl detektiv tutaraq onu sərvətlərini bölüşdürməyə məcbur etməyə çalışırdı.
“Daily Mail” isə yazıb ki, Skot Yanq Londonda daşınmaz əmlak biznesi ilə məşğul olub, Rusiya və digər keçmiş sovet respublikalarından olan oliqarxlara bahalı mülklərin satışını həyata keçirib. S.Yanq bu biznesdən sürətlə varlanıb və sərvəti 1 milyard dolları keçib. O, pullarının bir hissəsini Moskvada “Proyekt Moskva” adlı tikinti layihəsinə yatırıb.
Ancaq 2006-cı ildə bu layihə uğursuzluğa düçar olandan sonra biznesmenin pulları batıb. Boşanma prosesində biznesmen bildirirdi ki, tamamilə müflis olub və üstəlik 28 milyon funt-sterlinq borcu yaranıb.
Skot Yanqın bu il müəmmalı şəkildə ölən Berezovski ilə yaxın dost olduğu, ona 20 milyon funta mülk satdığı və tez-tez birlikdə nahar etdikləri də bildirilir. Biznesmen arvadından qalmaqallı boşanma prosesində ona 20 milyon funt ödəməyə məhkum edilib və yalan ifadəyə görə 6 ay həbsə məhkum olunub.
Qəzetin yazdığına görə, həbsxanada Yanqda belə təəssürat yaranmışdı ki, kimsə onun qətlini sifariş verib.
Skot Yanq və Berezovskinin zənginlərdən ibarət çevrəsinə 5 nəfər daxil idi. Qəzet yazır ki, bütün bu beş adamın hamısı son 4 ildə müəmmalı şəkildə ölüblər. Məsələn, bu ilin noyabrında həmin çevrəyə daxil olan maliyyə müşaviri Conni Eliçaoff müəmmalı şəkildə ölüb. O, Londondakı ticarət mərkəzinin damından aşağı yıxılıb.
Berezovskinin çevrəsinə daxil olan biznesmen Pol Kasl isə 2010-ci ildə London metrosunda qatarın altına düşüb. İki il əvvəl dostlardan daha biri, milyonçu Robert Kertisi Londonun şimal-qərbində qatar vurub. Berezovskini isə bu ilin martında Berkşir qraflığındakı evində ölü tapıblar.
xeberxetti.az
